Шымкентте із-түзсіз жоғалған 8 жасар бала табылды

Шымкентте қарт кісі 8 жасар немересінің түскі ас уақытында жоғалып кеткенін айтқан. Полиция жарты сағаттан соң баланы адасып жүрген жерінен тапқан, деп хабарлады Polisia.kz.

Полиция мәліметінше, баланы әжесі мен атасы 3 сағат бойы өздігінше іздеп, нәтиже шықпаған соң полиция қызметкерлерінің көмегіне жүгінген. Жоғалған баланы жедел-іздестіру шараларына патрульдік полиция полкінің жеке құрамы жұмылдырылып, қала аумағындағы тәртіп сақшыларына шұғыл бағыттама берілген.

Полиция мәліметінше, жарты сағатқа жуық тоқтаусыз жүргізілген іздеу жұмыстарының нәтижесінде бүлдіршін 4 шақырым қашықтықта адасып жүрген жерінен табылды. Бала аман-есен ата-әжесіне тапсырылды. Өз кезегінде жергілікті азамат тәртіп сақшыларына ризашылығын білдірді.