Талдықорғанда ата-ананың шағымынан соң балабақша тексеріліп жатыр

Талдықорған тұрғыны қаладағы балабақшалардың бірін видеоға түсіріп, ғимаратта балалар қауіпсіздігі ескерілмегеніне шағымданды. Видео авторы балабақшаның екінші қабатындағы терезелердің оңай ашылатынын, терезеге тор орнатылмағанын, сондай-ақ аулада балалар ойнайтын жер ретсіз жатқанын айтады. Қалалық білім басқармасы балабақшаға тексеру жүргізілетінін хабарлады, деп жазады KAZ.NUR.KZ тілшісі.

Талдықорғандағы № 4 балабақшада түсірілген бейнежазба Instagram желісінде жарияланды. Видео авторы балабақшаның екінші қабатындағы балалар ұйықтайтын бөлмеге кіріп, терезені ашып көрсетеді. Оның айтуынша, терезеге тор орнатылмағандықтан балалар құлап кетуі мүмкін.

"Барлық топта сондай, терезеде тор жоқ, балалардың қауіпсіздігі қайда? Балалар мұнда ұйықтайды", - дейді автор.

Одан соң әйел ауладағы сынып тұрған әткеншекті, балалар ойнайтын қалдық аралас құмды көрсетеді.

"Балалар ойнайтын жер жоқ. Құмның түрін қараңыздаршы. Ішінде не жоқ", - дейді ана.

Сондай-ақ видеодан балабақшадағы дәретханаларды көруге болады. Автордың айтуынша, балабақшада тек ересектерге арналған дәретхана қойылған.

Видеоға қатысты Талдықорған қаласының білім бөлімі өкілдері жауап берді.

"Білім бөлімі тарапынан комиссия құрылып, бүгінгі күні тексеру жүргізілуде. Бұл мәселе бақылауға алынды. Тексеру қорытындысы қосымша хабарланады", - делінген Жетісу облысының білім басқармасының хабарламасында.

Посмотреть эту публикацию в Instagram

Публикация от Instagram

Мәтіннен қате тапсаңыз, бізге жазыңыз