Елімізде қызылша ауруына байланысты мектептер карантинге жабыла ма

Оқушылар арасында қызылша ауруының көбеюіне байланысты елімізде мектептер карантинге жабылуы мүмкін бе? Бұл сұраққа Орталық коммуникациялар қызметінде өткен брифингте Оқу-ағарту министрі Ғани Бейсембаев жауап берді, деп хабарлайды KAZ.NUR.KZ.

"Денсаулық сақтау министрлігі қызылша ауруының көбеюіне жол бермеу үшін бірқатар шара қабылдап жатқанын білесіздер. Мектептерді карантинге жабылу, жабылмауына қатысты шешімді Денсаулық сақтау министрлігі шығарады. Сондықтан біз олардың шешімін күтеміз", - деді Оқу-ағарту министрі Ғани Бейсембаев.

Сондай-ақ NUR.KZ тілшісі санитарлық-эпидемиологиялық бақылау комитетінен мектептер карантинге жабылуы мүмкін бе деп сұрады.

"Қызылша ауруына байланысты мектептер жабылмайды. Бірақ мектеп басшылығы мен санитарлық-эпидемиологиялық бақылау департаментінің басшылары қызылша ауруы тіркелген кей сыныптарды онлайн оқытуға көшіру туралы шешім қабылдауға құқылы. Бәрі жағдайға байланысты", - деп хабарлады Санитарлық-эпидемиологиялық бақылау комитетінің баспасөз қызметі.

Айта кетейік, бүгін сенат отырысында Денсаулық сақтау вице-министрі Тимур Сұлтанғазиев қызылша ауруының көбеюі Қазақстанда да, басқа елдерде де байқалып отырғанын айтты. Оның айтуынша, бұған себеп – коронавирус пандемиясына байланысты балалардың қызылшаға қарсы екпені уақытында алмауы.

"Биыл қызылша ауруын жұқтырған 11 мың адам тіркелді. Шымкент, Алматы қалалары мен Алматы, Жамбыл облыстарында жағдай күрделі.

Бұл аймақтарда халық көп және туу көрсеткіші жоғары. Тиісінше, ол жерлерде ауру жұқтырғандар да көп", - деді Денсаулық сақтау вице-министрі.

Мәтіннен қате тапсаңыз, бізге жазыңыз