Шымкентте сәбиді терезеден лақтырып жіберген туысы жазадан құтылып кетуі мүмкін

Кеше Шымкентте терезеден туысы лақтырған сәби ауруханада көз жұмды. Нәрестені терезеден лақтырды деген күдікке ілінген ер адам жазадан құтылып кетуі мүмкін, деп хабарлайды KTK арнасы.

Арна мәліметіне сүйенсек, ер адамның психоневрология ауытқуы бар.

Оқиға уақытында үйде ер адамнан бөлек сәбидің анасы мен жеңгесі болған.

КТК арнасының мәліметіне сүйенсек, анасы мен жеңгесі баланы терезеден тастағанын байқап қалып, сыртқа жүгіріп шыққан.

Нәресте балалар ауруханасына жеткізілгенімен, кеше шетінеп кетті.

Ал оның 40 жастағы туысы қамауға алынды.

Айта кетейік, осыған дейін полиция баланы психоневрологиялық диспансерде есепте тұратын туысы терезеден лақтырғанын мәлім етті. Зардап шеккен сәби 2021 жылы туған.