Алматыда құтқарушылар тұрғындар мен қала қонақтарына үндеу жасады

Облыстық Төтенше жағдайлар департаментінің өкілдері Алматы облысы тауларында қар көшкіні болуы мүмкін деген қауіппен тұрғындарға ескерту жасады, деп хабарлайды ведомство Telegram-дағы ресми арнасында.

ТЖД мәліметінше, Алматы облысының тауларында 5-8 желтоқсан аралығында көшкін қаупі сақталады.

"ТЖД қар көшкіні қаупі болғандықтан азаматтардан, туристерден және демалушылардан қарлы беткейлерге шықпауды, сондай-ақ таулы жерлерде барлық қауіпсіздік пен мінез-құлық шараларын сақтауды сұрайды", - делінген хабарламада.

Ведомство ақпараты бойынша Алматы облысының аумағында Іле-Алатау тауларының оңтүстік беткейінде Еңбекшіқазақ, Талғар және Қарасай аудандарындағы 55 учаскеде көшкін қаупі бар.

Айта кетейік, негізінен температура фонының жоғарылауына және жаңбыр мен қар түрінде мол жауын-шашынның түсуіне байланысты қар көшкіні жүреді.

Мәтіннен қате тапсаңыз, бізге жазыңыз