Қазақстан жаратылыстану мен математика пәні бойынша 50 озық елдің қатарына кірді

Қазақстан жаратылыстану мен математика пәні бойынша 50 озық елдің қатарына енді. Бұл туралы оқу-ағарту министрі Ғани Бейсембаев Facebook-тегі парақшасында хабарлады.

Оқу-ағарту министрі Ғани Бейсембаев бүгін PISA рейтингінің тағы бір қорытындысы жарияланғанын мәлімдеді.

"Бұл білім сапасын бағалайтын маңызды халықаралық жүйе. Еліміз математика және жаратылыстану пәндері бойынша ТОП-50 елдің ішіне кірді. Жаратылыстану пәнінен көрсеткіштер 26 балға артып, математика мен оқу сауаттылығы бойынша өткен нәтижелер сақталған. Бұл жерде мектептеріміздің рөлін ерекше атап өткен жөн", – деді Ғани Бейсембаев.

Оның айтуынша, Қазақстанда қала мен ауылдық жерлерде тұратын оқушылар арасындағы білім сапасының көрсеткіштеріндегі айырмашылық азайып келе жатыр. Жалпы, 81 елдің ішінде Қазақстан математикадан 46-орынды (2018 жылы 54), оқудан – 61-орынды (2018 жылы 69), жаратылыстану пәнінен – 49-орынды (2018 жылы 69) иеленген.

Еске салайық, бүгін, желтоқсанның 5-і оқу-ағарту министрі Ғани Бейсембаев үкіметте өткен брифингте мектеп қабырғасында сабақ кезінде оқушылардың смартфон пайдалануын шектеу жоспарына қатысты пікір білдіргенін жазған едік.