Байқоңырда үш көшеге қазақ батырларының есімі берілді

Байқоңырда үш көшеге қазақ батырларының есімі берілді, деп хабарлайды Sputnik Қазақстан қала әкімдігіне сілтеме жасап.

"Осылайша, қонақ үй жолы Әлия Молдағұлова атындағы көшеге, Авиационная көшесінің Гвардейскаядан Қалмырза Жарманов көшесіне дейінгі бір бөлігі Бауыржан Момышұлы атындағы көше болып өзгертілді, қаланың алтыншы шағын ауданындағы орамішілік жол енді Мәншүк Мәметова көшесі деп аталады", - дейді қала әкімдігінің өкілдері.

Агенттік тілшісінің хабарлауынша, жалпы Байқоңырда көшелердің аты сирек өзгертіледі. Бірақ соңғы жылдары мұнда Абай даңғылы пайда болған. Сондай-ақ қалада Қорқыттың атымен аталатын көшеде бар.

Ал қалада Қалмырза Жарманов атындағы көше осыдан төрт жыл бұрын пайда болған. Қалмырза Жармановты Байқоңыр тұрғындары Ұлы Отан соғысының ардагері, қаланың құрметті азаматы ретінде таниды.

Мәтіннен қате тапсаңыз, бізге жазыңыз