Алматы әкімдігі қаланы Жаңа жылға безендіру үшін жарты миллиард теңге жұмсады

Алматы қаласы Мәдениет басқармасы жаңажылдық мерекеге орай қаланы безендіруге қанша қаржы жұмсалғанын мәлімдеді, деп хабарлайды KAZ.NUR.KZ тілшісі.

Әкімдіктің хабарлауынша, әр ауданды безендіруге қалалық бюджеттен орта есеппен 60 миллион теңге бөлінген.

"Конкурстық негізде өткізілген мемлекеттік сатып алудың қорытындысы бойынша шығынның жалпы сомасы ҚҚС-ты есепке алғанда 511 762 709 теңге", - деп хабарлады қалалық мәдениет басқармасындағылар.

Айта кетейік, бұған дейін Алматыда 20 желтоқсанда қаланың бас шыршасын жағу шарасы өтетіні хабарланған. Ол Абай алаңында орналасқан және биіктігі 20 метр. Салтанатты шамды жағу рәсімі кезінде мерекелік концерт өтеді.

Мемлекеттік сатып алулар порталында шырша 500 ойыншықпен безендіріліп, ұзындығы 7 мың метр болатын жарық шамдармен әсемделуі керегі айтылған.

Сондай-ақ қаланың түрлі ауданында шыршалар орнатылып, қоғамдық орындар да безендірілген. Жаңа жыл түні мерекелік отшашу болады.