Жолаушылар Тараз әуежайында қалып қойған: SCAT әуекомпаниясына қатысты тергеу басталды

Қазақстандық SCAT әуекомпаниясына қатысты Тараздан Новосібірге орындалуға тиіс болған рейстің кешігуіне байланысты жолаушылардың құқығын сақтау бойынша тергеу басталды. Бұл туралы KAZ.NUR.KZ тілшісі ААК-ға сілтеме жасап хабарлайды.

DV-5325 рейсі 19 желтоқсанда кешіккен. Рейс техникалық себеппен және әуе кемесін ауыстырумен 14 сағат 6 минутқа кешіккен еді.

Азаматтық авиация комитетінің өкілдері әуе кемесінің бортында 214 жолаушы, оның ішінде 14 бала және екі сәби болғанын айтты.

"Ұшуды күту кезінде жолаушыларға алкогольсіз сусындар мен тамақ берілді. Алдын ала ақпаратқа сәйкес, қонақүйде тұру бойынша қызметтер көрсетілмеген", - деп хабарлады ведомстводағылар.

Егер рейстің кешігуі кезінде қызметтердің тиісінше көрсетілмеу дерегі анықталса, онда әуекомпания әкімшілік жауапкершілікке тартылуы мүмкін, деп қосты комитеттегілер.