Қазақстанда қолайсыз ауа райына байланысты қай өңірлерде жол жабылды

Қолайсыз ауа райына байланысты Қазақстанның бірқатар өңірінде жолдарды жабу я шектеу шаралары жалғасып жатыр. Бұл туралы QazAvtoJol өкілдері Telegram-арнасында мәлім етті.

4 облыста республикалық маңызы бар автожолдардың 4 учаскесінде көлік қозғалысына шектеу енгізіліп отыр:

️Ақтөбе облысында – 1 учаске

"Ақтөбе-Атырау-Астрахань" 97-330 км, Қандыағаш қаласы - Атырау облысының шекарасы – 233 км. Шектеу автокөліктің барлық түріне қолданылатыны айтылады.

Жамбыл облысында – 1 учаске

"Алматы-Ташкент-Термез" 159-238 км, Кенен ауылы - Қайнар ауылы – 79 км. Жүк көліктері үшін шектеу енгізілді.

Батыс-Қазақстан облысында – 1 учаске

"Орал-Тасқала-РФ шекарасы" 4-104 км, Орал қаласы-РФ шекарасы – 100 км. Шектеу автокөліктің барлық түріне қолданылады.

Қостанай облысында – 1 учаске

"Қарабұтақ-Комсомольское-Денисовка-Рудный-Қостанай" 386-503 км, Денисовка ауылы - Рудный қаласы – 117 км. Шектеу жүк және қоғамдық көліктерге қолданылады.

"Қазіргі уақытта республикалық маңызы бар автожолдарды күтіп-ұстауға 454 бірлік техника және 586 жолшы жұмылдырылды", - делінген хабарда.

Айта кетейік, республикалық маңызы бар автожолдарда қысқы күтіп-ұстау жұмыстары қарқынды жүргізіліп, қар тазалау техникалары тәулік бойы жұмыс істейді.