Астана халықаралық әуежайында оннан астам рейс кешіктірілді

Бүгін елорда халықаралық әуежайында 11 рейс кешіктірілді. Бірқатар қалаға ұшатын рейс тоқтатылды, деп хабарлады Астана халықаралық әуежайы Telegram арнасында.

Астана халықаралық әуежайы баспасөз қызметінің ақпараты бойынша, қаңтардың 14-і Астана халықаралық әуежайында 11 рейс кешіктіріліп, Астанадан Алматыға, Жезқазғанға, Түркістанға ұшатын 3 рейс әуекомпанияның шешімімен тоқтатылды.

Сондай-ақ әуежай баспасөз қызметі мәліметіне сүйенсек, рейстер метео жағдайға байланысты кешіктірілген не тоқтатылған жоқ.

Астана әуежайында қазір ұшу және қонуға қолайлы ауа райы сақталып тұр. Әуеайлақтағы ауа температурасы -18 градусқа жетеді. Жел жылдамдығы – 12 м/с.

Еске салайық, бұған дейін ауа райына байланысты Астана әуежайында 12 рейс кешіктірілгені туралы жазған едік.

Ал қаңтардың 10-ы Астана халықаралық әуежайы өкілдері елордада күн бұзылуына байланысты жолаушыларға үндеу жасаған болатын – қалада дауылдық ескерту жарияланған еді.