"Көрпе-жастығы кір": желіде Атырау ауруханасында түсірілген видео тарады

Әлеуметтік желіде Атыраудағы №2 облыстық ауруханадан түсірілген видео тарады. Бейнежазбадан ауруханадағы кір-қожалақ төсек-орындарды, қағазбен желімделген есік-терезені көруге болады. Видеоны науқас баланың анасы түсіріп алған, деп хабарлады КТК телеарнасы.

Баласы ішек инфекциясынан емделіп жатқан әйелдің сөзінше, ауруханада ешқандай жағдай жасалмаған. Аязда палатаның есік-терезесін қағазбен желімдеп әупірімдеп отырған көрінеді. Төсек-орны да ескі-құсқы, кір-қожалақ.

Ал аурухана әкімшілігі емдеу мекемесі 2016 жылдан бері күрделі жөндеу көрмегенін, оған қоса науқастардың көптігінен палаталарға ескі кереует кіргізуге мәжбүр болғанын айтты. Әкімшілік өкілдерінің айтуынша, тазалық уақтылы жасалады, төсек-орындар да санитарлық талапқа сай.

"Бұл аурухана қазір үш аурухананың орнын жауып отыр. Ересектердің инфекциялық ауруханасы, балаларға арналған инфекциялық аурухана және бізде қалалық балалар ауруханасы жоқ. Осы үш аурухананың орнын жауып отырмыз. Науқастар қайда барады? Баратын жер жоқ, осы жерден емдейміз", - дейді №2 Атырау облысы ауруханасының директоры Надя Ерғалиева.

Аурухана басшылары биыл ғимаратқа жөндеу жүргізілетінін алға тартты.

Дереккөз: КТК телеарнасы

Мәтіннен қате тапсаңыз, бізге жазыңыз