Екібастұзда ер адам толғағы қысқан әйелін үйде босандырып алды

28 қаңтарға қараған түні Екібастұзда 36 жастағы әйелдің толғағы басталған. Жедел жәрдем бригадасы жетіп үлгергенше әйелді үйінде күйеуі босандырып алған, деп жазады pavlodarnews.kz сайты.

Басылым ақпаратынша, әйел жүктіліктің 41-аптасында болған. Жедел жәрдем бригадасы шақыртудан соң тоғыз минуттан кейін жеткен. Сол уақыт аралығында толғақ қысқан әйелін үйде күйеуі босандырып алған. Жедел жәрдем диспетчері жүкті әйелдің жолдасына телефон арқылы нұсқау беріп отырған. Медицина қызметкерлері жеткен кезде келіншек босанып үлгерген.

"Ер адам қорқынышқа бой алдырмай, белгіленген алгоритм бойынша әрекет етті. Дүниеге келген сәби мен анасының жағдайы жақсы. Олардың екеуі де Екібастұздың перзентханасына жеткізілді", – дейді облыстық жедел жәрдем станциясы басшысының орынбасары Ольга Вербовая.

Өткен жылы өңірде 103 қызметкерлері 22 әйелді үйде босандырған. Ал биыл алты әйел үйінде босанған екен.