ҰҚК Алматыда қару-жарақ арсеналын тапты (фото)

24 қаңтарда Ұлттық қауіпсіздік комитеті Алматы қаласында қару арсеналы жасырылған орынды анықтады. Бұл туралы ведомство ресми сайтында хабарлады.

ҰҚК ақпаратынша, "Калашников" автоматтарын, тапаншалар мен мылтықтарды қоса алғанда 30 қару-жарақ, сондай-ақ 5 граната, 10 түтіндету құтысы және әртүрлі калибрдегі 221 патрон табылған.

"Алдын ала деректер бойынша табылған қару "қаңтар оқиғасы" кезінде ұрланған", - делінген хабарламада.

Қазіргі уақытта сотқа дейінгі тергеп-тексеру жүргізіліп жатыр.

Айта кетсек, Ұлттық қауіпсіздік комитеті 27 қаңтарда халықаралық террористік ұйымның әрекетіне қатысы бар болуы мүмкін күдікті 22 жастағы қазақстандықты Стамбұлдан Алматыға депортациялаған болатын.

Мәтіннен қате тапсаңыз, бізге жазыңыз