Атырауда су тасқынына байланысты төтенше жағдай жарияланды

Атырауда бір аптаға созылған су тасқынына байланысты төтенше жағдай жарияланды. Алайда жергілікті билік әзірге су тасқынына төтеп бере алмай отыр, деп хабарлайды КТК арнасына сілтеме жасаған KAZ.NUR.KZ.

Атырауда 10 күннен бері үйлерді еріген су басып жатыр. Су тартылып жатқанымен, бірнеше ықшамауданның тұрғындары әлі үйлеріне кіре алмай жүр.

"Олар төтенше жағдай жариялады, құдық сүзгілерін орнатты. Бірақ су сол күйінде қалды. Ешқандай азайған жоқ. Ал ертең үйіміз суға батып, жарылып кетсе, кім кінәлі болады? Бізге кім көмектеседі, бәрі қалпына келе ме?", – деді жергілікті тұрғын Ырысты Сахарбайқызы.

Арна мәліметіне сүйенсек, қалада төтенше жағдай жарияланды. Су тасқынымен күресті күшейту үшін қосымша қаражат пен техника бөлінді. Алайда, үй-мүлкін су басқандарға келтірілген шығын өтеле ме, жоқ па, әзірге белгісіз.

"Екі компаниямен келісімшарт жасалды. Бүгінгі таңда 22 ұңғыма сүзгілеу сорғылары орнатылды. Жалпы, төтенше жағдай шешімімен ұңғыма сүзгілеу сорғыларына және айдалатын жер асты суларын шығаруға 240 млн теңгеден астам қаражат бөлінді. Материалдық өтемақы мәселесі көтерілген жоқ", - деді Атырау қаласы әкімінің орынбасары Ерболат Омаров.

Айта кетейік, осыған дейін Атырау тұрғындары өңірде төтенше жағдай жариялауды талап еткен болатын.