ІІМ өкілдері жүргізушілерге үндеу жасады

Ішкі істер министрлігі елдегі ауа райының қолайсыздығына байланысты көлік жүргізушілеріне үндеу жасады. Ведомство өкілдері алыс жолға шықпауды сұрады, деп хабарлайды ІІМ-нің Telegram-дағы арнасына сілтеме жасаған KAZ.NUR.KZ.

"Құрметті жүргізушілер! Қолайсыз ауа райына байланысты сіздерді алыс сапарға шықпауға шақырамыз. Қазіргі уақытта 8 өңірде 30-ға жуық жол учаскесі жабық", - делінген хабарда.

Ведомство мәліметінше, республикалық маңызы бар автожолдарда құтқару жұмыстарына 658 техника мен 1,5 мыңға жуық адам жұмылдырылды.

"Жолда қалып қойған азаматтар үшін эвакуацияға дейін және қосымша көмек күші жеткенше жылыту және тамақтану пункттері ұйымдастырылды. 112-нің ескертулеріне назар аударыңыз, өзіңіз бен жақындарыңызға сақ болыңыз", - деп хабарлады министрліктен.