Оқулықтардың мазмұнын талқылауға енді барша қазақстандық қатыса алады

Қазақстандықтарға жаңа әзірленген оқулықтардың мазмұнын талқылауға қатысу мүмкіндігі беріліп отыр. Бұл туралы Оқу-ағарту министрлігіне сілтеме жасаған KAZ.NUR.KZ хабарлайды.

ҚР Оқу-ағарту министрлігінің Республикалық ғылыми-практикалық білім мазмұнын сараптау орталығы биыл 12 ақпаннан бастап жаңадан әзірленген оқулықтардың мазмұнына қоғамдық талқылаулар жүргізіліп жатқанын мәлімдеді.

"Қоғамдық талқылауға ғылыми-педагогикалық қоғам өкілдері, әдіскерлер, ғалымдар, сондай-ақ оқулықтардың сапасына бей-жай қарамайтын қазақстандықтар қатысуға мүмкіндік алды", - делінген ведомствоның Telegram арнасында жарияланған хабарламада.

Министрлік өкілдерінің мәлімдеуінше, талқылау talkylau.ebmso.edu.kz сайтында жүргізіледі.

Осы сайт арқылы қоғам мен ғылыми-педагогикалық қауымдастық өкілдері оқулықтар мазмұнының сапасы, құрылымы, әдістемелік тәсілдері, баяндау тілі мен безендірілуіне қатысты сындарлы пікірін білдіре алады.

Ол үшін мына қадамдарды орындау қажет:

• веб-порталда тіркелу;
• оқулықтардың түпнұсқа-макеттерімен танысу;
• "түсініктеме қосу" тетігі арқылы оқулықтардың мазмұны мен құрылымына қатысты сын-пікірлер, ұсыныстар мен ескертулер жазу.

Сайтта жаңадан әзірленген мынандай оқулықтар бар:

• 3-сыныпқа арналған "Еңбекке баулу", "Бейнелеу өнері", "Орыс тілі" (орыс тілінде оқытатын мектептер үшін), шет тілдері (ағылшын, француз);
• 3,9-11 сыныптарға арналған "Неміс тілі";
• 5-9 сыныптарға арналған "Жаһандық құзыреттілік" оқулықтары қағаз нұсқада;
• 3-сыныпқа арналған "Цифрлық сауаттылық/ Цифровая грамотность" пәні бойынша электронды оқулықтар.