Алматы әуежайындағы қазіргі жағдай қалай: Азаматтық авиация комитеті мәлімдеме жасады
Опубликовано:
14 наурызда толассыз жауған қар салдарынан Алматы әуежайында тағы ондаған рейс кешігіп жатыр. Бұл ұшу кестесінің өзгеруіне әсер еткен, деп хабарлайды Азаматтық авиация комитетіне сілтеме жасаған KAZ.NUR.KZ.
Ведомство мәліметінше, 14-15 наурызда Алматы қаласының әуежайында ауа райының күрт нашарлауына (қардың көп түсуіне) байланысты бірқатар халықаралық және ішкі рейс кешіккен және тоқтаған.
"15 наурыз сағат 17.00-дегі мәлімет бойынша Алматы әуежайында 32 рейс кешігіп жатыр. Оның 14-і ұшып келу, 18-і ұшып шығу уақытынан кешігіп жатыр. Кешігудің негізгі себебі – 2024 жылғы 14 наурыздағы ауа райының қолайсыздығына байланысты, соған сәйкес рейстер кестесі өзгерді", - делінген хабарламада.
Комитет өкілдері 16 наурыз сағат 04:00-ге дейін ұшу кестесі толығымен қалпына келтірілетінін мәлім етті.
Еске сала кетейік, 14 наурызда түстен кейін басталған қалың қарға байланысты Алматы әуежайы сағат 19:00-ден бастап ұшақтарды қабылдауды уақытша тоқтатқан еді. Әуежай жұмысы кешкі сағат 22.00-де қайта жанданды.
Сонымен қатар Алматы әуежайының өкілдері жолаушылар шағымына жауап берген болатын.
Мақаланың түпнұсқасы: https://kaz.nur.kz/society/2069241-almaty-auezaiyndagy-qazirgi-zagdai-qalai-azamattyq-aviaciya-komiteti-malimdeme-zasady/