Алматы облысында жоғалған бүлдіршінді іздеуге "Қазавиақұтқару" тікұшағы тартылды

Алматы облысында 17 наурызда жоғалып кеткен кішкентай қызды іздеуге "Қазавиақұтқару" тікұшағы жұмылдырылды. Бұл туралы KAZ.NUR.KZ Төтенше жағдайлар министрлігінің баспасөз қызметіне сілтеме жасап хабарлайды.

Ведомство мәліметінше, 17 наурыз сағат 21:44-те Алматы облысының Төтенше жағдайлар департаментіне Еңбекшіқазақ ауданы Күш ауылы Безымяное көлінің маңында 2021 жылы туған қыз баланың жоғалып кеткені туралы хабарлама келіп түскен.

"Бүлдіршін 16:30-да ересектердің қарауынсыз қалып, үйден шығып кетіп оралмаған. Іздеу орнында жедел штаб құрылды. Іздеу жұмыстарына ТЖД, РЖҚЖ, ПД, ҰҰ ә/б, аңшылық шаруашылығы қызметкерлері, жергілікті тұрғындар, еріктілер арасынан 300-ге жуық адам және 80-ге жуық техника, тепловизоры бар 4 пилотсыз ұшу аппараты, сондай-ақ "Қазавиақұтқару" тікұшағы жұмылдырылды", - делінген ТЖМ хабарламасында.

Министрлік өкілдерінің хабарлауынша, бала жүруі мүмкін деген жерлердің барлығы тексерілуде. Сондай-ақ РЖҚЖ құтқарушылары 30 метр қашықтықта орналасқан су қоймасын да сүзіп шықты. Бұдан бөлек тартылған күштер мен құралдар кинологиялық есептоптарды пайдалана отырып, оқиға орнында және су қоймасының жағалау сызығы бойымен іздестіру жұмыстарын жүргізуде.

"Үздіксіз байланысты қамтамасыз ету үшін іздеу жұмыстары орнында ТЖД командалық-штабтық машинасы орналастырылды. Іздеу жұмыстары жалғасуда", - деп қосты ТЖМ өкілдері.

Еске сала кетсек, бұған дейін Алматы облысының Күш ауылында екі күн бұрын жоғалып кеткен кішкентай қыздың әлі табылмай жатқанын, оны іздеу жұмысына 300-ге жуық адам мен арнайы үйретілген иттер жұмылдырылғанын жазған едік.