Желіде Алматыдағы балабақшада түсірілген егеуқұйрықтардың видеосы тарады

Желіде Алматыдағы балабақшалардың бірінде екі егеуқұйрықтың жүргені түсірілген видео таралып жатыр. Қалалық білім басқармасы видеоға қатысты жауап берді, деп хабарлайды KAZ.NUR.KZ.

Instagram желісінде жарияланған видеода екі егеуқұйрық түсірілген. Кадрларда олардың бірі кереуеттің артына, екіншісі сол кереуеттің астына жайғасқаны көрсетілген. Видеода Алматыдағы балабақшада түсірілгені айтылады.

Алматы әкімдігінің Білім басқармасы видеоға қатысты NUR.KZ тілшісіне жауап берді. Егеуқұйрықтардың №110 бөбекжайдан табылғаны белгілі болды.

"Түскен арыз-шағымдарға байланысты 16 наурызда балабақшада дезинфекция және дератизация шаралары жүргізілді.

Білім басқармасы балабақша қызметін бақылау үшін комиссия құрды, оның қорытындысы бойынша балабақша әкімшілігіне тиісті шаралар қолданылады", - деді ведомство өкілдері.