Ақтөбе облысында су тасқынынан үш ауылда көлік қатынасы тоқтады

Ақтөбе облысының Байғанин ауданына қарасты Оймауыт, Миялы, Дияр ауылдарында үш күннен бері қатынас жоқ. Бұл туралы KAZ.NUR.KZ хабарлайды.

Ақтөбе облысында су тасқынына байланысты жағдай күрделі. 1500-ден аса тұрғыны бар үш елді мекенде байланыс үзілген. Аудандық әкімдік өкілдерінің хабарлауынша, ауылдарда азық-түлік қоры жеткілікті.

"Жаңажол ауылдық округінің Оймауыт, Миялы, Дияр ауылдарында 10 күнге жеткілікті азық-түлік қоры бар. Оймауыт ауылында амбулатория, Миялы, Дияр ауылдарында медпункттер жұмыс істеп тұр, жедел-жәрдем көмегіне мұқтаж адамдар жоқ", - деп хабарлады Байғанин ауданы әкімдігінің өкілдері.

Ақтөбе облысы ТЖД қызметінің мәліметінше, ағын су тасжолдарды да шайып кеткен. Ақтөбе облысының аумағында су тасқыны басталғалы бері Шалқар ауданының "Қандыағаш - Ембі - Шалқар - Ырғыз" республикалық маңызы бар автожолы және Мұғалжар ауданының "Қожасай - Жаңажол" жергілікті маңызы бар жолын да су шайып кеткен.

"Бұдан бөлек екі жағдай орын алды. Біріншісі – Байғанин ауданының "Қарауылкелді - Алтай батыр - Миялы" жергілікті маңызы бар автожолының 63 шақырымында су өткізу құрылғысының шайылуы. Соның салдарынан Оймауыт, Дияр және Миялы елді мекендері мен аудан орталығы арасындағы жол қатынасы үзілді. Сондай-ақ Ойыл ауданындағы "Амангелді - Көптоғай" жолы, салдарынан барлық еріген су Көптоғай ауылы арқылы өтіп, тұрғын үйлерге су басу қаупін тудырды. Алайда ешбір үйді су баспады", - дейді Ақтөбе облысы ТЖД қызметінің өкілдері.