"Қазақстанда мұндай жағдай бірінші рет болып отыр": су ресурстары министрі қызметінен кете ме

Бүгін үкімет брифингінде су ресурстары және ирригация министрі Нұржан Нұржігітовке "Қазақстандағы су тасқынына байланысты қызметіңізден кетесіз бе" деген сұрақ қойылды. Бұл туралы KAZ.NUR.KZ тілшісі хабарлайды.

Министр Нұржан Нұржігітов жақында президенттен сөгіс естігенін айтты.

"Маған қатаң сөгіс жарияланды. Енді жергілікті атқарушы органдар және Төтенше жағдайлар министрлігімен бірлесіп алдын алу іс-шараларын жүргізу міндеті тұр. Қазір барлық мемлекеттік орган осы бағытта жұмыс жүргізіп жатыр. Бұл жұмыстардың қорытындысы бойынша одан әрі тәртіптік жазалау шаралары қарастырылып, шара қолданылады.

Қазақстанда кейінгі 30 жылда су тасқыны кезінде мұндай жағдай, су деңгейінің көтерілуі бірінші рет болғанын түсінуіміз керек. "Қазгидрометтің" болжамын ескере отырып, су қоймаларындағы контейнерлерді босатуды бастадық. Наурызда су қоймаларына 3 текше км су жинадық. Қазір әлі де бос орын бар, оны су тасқынының екінші кезеңінде жинаймыз", – деді министр.

Бұл ретте журналистер Нұржан Нұржігітовке су тасқынына байланысты қызметінен кетуі мүмкіндігі туралы сұрақ қойды.

"Тағы да атап өткім келеді, бұл шешім біздің су тасқынының алдын алуға бағытталған жұмыстардың нәтижесі бойынша қабылданады", - деп жауап берді министр.

Еске салайық, елімізде су ресурстары және ирригация министрлігі 2023 жылғы қыркүйек айының басында құрылған болатын. 4 қыркүйекте ведомство басшысы болып бұған дейін Жамбыл облысының әкімі қызметін атқарған Нұржан Нұржігітов тағайындалған еді.