Қазақстандықтардың жеке деректері тарап кетті: министрлік Zaimer.kz-ке қатысты тексеріс нәтижесін жариялады

Цифрлық даму, инновациялар және аэроғарыш өнеркәсібі министрлігі Zaimer.kz микроқаржы ұйымының клиенттері саналатын қазақстандықтардың 2 миллионнан астам жеке дерегінің тарап кетуіне қатысты жүргізілген тексеріс нәтижесін жариялады. Бұл туралы ведомствоға сілтеме жасаған KAZ.NUR.KZ хабарлайды.

2024 жылғы 5 наурызда "Мемлекеттік техникалық қызмет" АҚ (МТҚ) Zaimer.kz ("МФО Робокэш.кз" ЖШС) микроқаржы ұйымының клиенттері саналатын қазақстандықтардың 2 миллионнан астам жеке дерегінің таралғанын анықтады.

ЦДИАӨМ өкілдерінің мәліметінше, МТҚ Қазақстан азаматтарының арасынан "МФО Robokesh.kz" ЖШС клиенттерін анықтай отырып, таралған деректерге талдау жүргізген.

"Ұлттық ақпараттық технологиялар" АҚ Egov Mobile мобильді қосымшасы арқылы азаматтарға, сондай-ақ Egov порталының жеке кабинетіне қылмыскерлердің жеке деректеріне қол жеткізудің ықтимал теріс салдарын болдырмау үшін тиісті хабарламалар мен ұсыныстар жіберген.

"Хабарландыру жүйесі пилоттық режимде іске қосылды, өйткені азаматтарды дербес деректердің сыртқа шығуы туралы хабардар ету құзыреті 2023 жылғы 11 желтоқсанда белгіленді және "Қазақстан Республикасының кейбір заңнамалық актілеріне ақпараттық қауіпсіздік, ақпараттандыру және цифрлық активтер мәселелері бойынша өзгерістер мен толықтырулар енгізу туралы" заңына сәйкес 2024 жылғы 1 шілдеден бастап қолданысқа енгізіледі.

Бүгінгі таңда осы фактіге қатысты министрлікке азаматтардан 5200-ден астам өтініш келіп түскен.

Министрліктің Ақпараттық қауіпсіздік комитеті Қазақстан Республикасы Қаржы нарығын реттеу және дамыту агенттігімен бірлесіп, "Robokesh.kz" МҚҰ" ЖШС-не Қазақстан Республикасының дербес деректер және оларды қорғау туралы заңнамасының талаптарын сақтауына қатысты жоспардан тыс тексеру жүргізді", – делінген хабарламада.

Тексеру қорытындысы бойынша әкімшілік іс қозғалып, "МФО Robokash.kz" ЖШС әкімшілік жауапкершілікке тартылып, 1000 АЕК мөлшерінде, жеңілдетілген тәртіпте, "МФО Robokash.kz" ЖШС әкімшілік айыппұл салынды, ӘҚБтК-нің 79-бабының төртінші бөлігіне сәйкес 500 АЕК (1 846 000 теңге) көлемінде айыппұл төленді.

Ведомсто өкілдерінің айтуынша, бұл ретте азаматтар Қазақстан Республикасы Азаматтық кодексінің 951-бабына сәйкес дербес деректердің таралуынан келтірілген материалдық немесе моральдық зиянды өтеу туралы мәселені қарау үшін азаматтық сотқа жүгінуге құқылы.