Иран-Израиль қақтығысы: Қорғаныс министрлігі өкілі Голан жоталарындағы қазақстандық бітімгерлер туралы айтты

Қорғаныс министрлігі ресми өкілі Руслан Жангулин "Голан жоталарында БҰҰ бітімгерлік миссиясын орындап жатқан қазақстандық бітімгерлерге қауіп бар ма" деген сұраққа жауап берді. Бұл туралы Қазақпарат агенттігі хабарлады.

"Голан жоталарында БҰҰ бітімгерлік миссиясын орындап жатқан қазақстандық контингент қалыпты режимде жұмысты жалғастыруда. Жеке құрамның өмірі мен денсаулығына ешқандай қауіп жоқ", - деп жауап берді Қорғаныс министрлігінің ресми өкілі Руслан Жангулин.

Бұған дейін Иран Израильге қарай ұшқышсыз ұшақтарын ұшырып, Тегеран үстіндегі әуе кеңістігін жауып тастаған болатын.

Айта кетейік, 16 наурызда Қарулы күштердің әскери қызметшілері Қазақстаннан Сирия астанасы Дамаскіге ұшып барып, Фауар бітімгерлік базасына дейін көлікпен жеткенін хабарлаған едік.