"4 мамыр – жұмыс күні": қазақстандықтар мамырдағы мерекеде нақты қанша күн демалатыны белгілі болды

Мамыр айындағы мереке күндеріне байланысты 4 мамыр – жұмыс күні болып бекітілді. Еңбек және халықты әлеуметтік қорғау министрлігі тиісті бұйрықты жариялады, деп хабарлайды KAZ.NUR.KZ ведомствоға сілтеме жасап.

Еңбек кодексінің 85-бабы 3-тармағына сәйкес жұмыс уақытын ұтымды пайдалану мақсатында тиісті бұйрыққа қол қойылды.

"Демалыс күні 2024 жылғы 4 мамыр сенбіден 2024 жылғы 8 мамыр сәрсенбіге ауыстырылсын", - делінген бұйрықта.

Бұйрық қол қойылған күннен бастап күшіне енеді.

Осылайша, қазақстандықтар үш күн қатарынан, яғни 7, 8 және 9 мамыр демалады. Ел тұрғындары 7 мамырда Отан қорғаушылар күнін және 9 мамырда Жеңіс күнін тойлайды.

Ал 4 мамыр – сенбі жұмыс күні болып бекітілді.

Сонымен қатар 1 мамырда қазақстандықтар Қазақстан халқының бірлігі мерекесін атап өтеді.