Астана мен Алматыда субұрқақтар қашан іске қосылатыны белгілі болды

Астана мен Алматыда субұрқақтар 1 мамырдан бастап іске қосылмақ. Қазір мегаполистердегі құрылыс нысандарында дайындық және жөндеу жұмыстары жүріп жатыр, деп хабарлайды KAZ.NUR.KZ.

Астана әкімдігінің ресми сайтындағы ақпаратқа сүйенсек, қазір елордада субұрқақтарды іске қосуға дайындық жүріп жатыр: қайта консервациялау және жөндеу-қалпына келтіру жұмыстары жүргізілуде.

"Қазақстан халқының Бірлігі күні – 1 мамырда Астанада дәстүрлі түрде субұрқақтар іске қосылады.

Қазіргі уақытта елорда аудандарының әкімдіктері фонтандарды дайындау жұмысын белсенді жүргізуде. Қалада 50-ден астам субұрқақ іске қосылады", - делінген әкімдік хабарламасында.

Сондай-ақ Алматы әкімдігінің NUR.KZ тілшісіне берген мәліметіне сәйкес, Алматыда "Алматы – біздің ортақ үйіміз" акциясы аясында 1 мамырда сағат 11.00-де субұрқақтар іске қосылады.

Экология және қоршаған орта басқармасының дерегінше, Алматыда 150 субұрқақ болса, оның 66-сы коммуналдық меншік болып саналады.

Мәтіннен қате тапсаңыз, бізге жазыңыз