Мамырдың алғашқы күндері Қазақстанның кей өңірінде қатты жауын-шашын болады

Орталық коммуникациялар қызметінде өткен брифингте "Қазгидромет" РМК баспасөз хатшысы Алина Ысмағұлова Қазақстан бойынша алдағы үш күнге арналған күн райы болжамын ұсынды. Бұл туралы KAZ.NUR.KZ хабарлайды.

"Қазгидромет" РМК өкілінің мәлімдеуінше, Қазақстанның басым бөлігінің ауа райына атмосфералық фронталды бөлімдер әсер етеді, соның ықпалымен оңтүстікте, оңтүстік-шығыста қатты жаңбыр жауады, солтүстікте, шығыста, орталықта қатты жауын-шашын (жаңбыр, қар) болады.

Республика бойынша жел күшейеді, найзағай ойнайды, оңтүстікте, оңтүстік-шығыста, орталықта бұршақ жауады, оңтүстікте, оңтүстік-шығыста дауыл тұрады, оңтүстік-батыста, оңтүстікте, батыста шаңды дауыл болады, солтүстікте тұман түседі.

Түнде Солтүстік Қазақстан облысында, Ақмола, Қостанай облыстарының батысында, солтүстігінде, Ақтөбе облысының солтүстік-батысында, Павлодар облысының шығысында, оңтүстігінде, Ұлытау облысының солтүстігінде 1-6 градус үсік жүреді.

Кей өңірлерде дауылды ескерту жарияланды. 1-2 мамырда Жетісу, Жамбыл облыстарында, 1-3 мамырда Алматы облысында қатты жауын-шашын жауу ықтималдығына байланысты тау және тау етегіндегі аймақтарда беткейлік ағындының қалыптасуы және өзендерде су деңгейлерінің көтерілуі күтіледі, сонымен қатар су жайылуы, су басуы мүмкін.