"Сұлулығы тек амбициясымен бәсекелесе алады": Дуров Қазақстанға сапары туралы айтты

Telegram мессенджерінің негізін қалаушы Павел Дуров әлеуметтік желіде Қазақстанға сапары туралы әсерін бөлісіп, суреттерін жариялады. Бұл турлы KAZ.NUR.KZ хабарлайды.

Миллиардер Telegram-дағы ресми арнасында жазба жариялады. Жазбада ол Қазақстанға сапары барысында Алматы мен Астанада, табиғаты көркем Бурабай мен Шарын шатқалына барғанын айтты.

"Қазақстанның сұлулығы тек амбициясымен бәсекелесе алады. Бұл ел бизнеске қолайлы саясат пен салықтардың арқасында халықаралық компаниялар мен технологиялық стартаптарды тартады. Сондай-ақ инновациялық мектептер мен университеттерді қолдау арқылы білім мен ғылымдағы позициясын жақсартып жатыр", - деп жазды ол.

Дуровтың сөзінше, Telegram мессенджерін Қазақстанда 12,5 миллионнан астам қолданушы пайдаланады.

Еске салайық, маусымның соңында Telegram мессенджерінің негізін қалаушы Павел Дуров Астанаға келген еді. Оны Қазақстанға Цифрлық даму, инновациялар және аэроғарыш өнеркәсібі министрі Жаслан Мәдиев шақырған.

Сол күні Дуровтың Astana Hub-та эскалаторға мініп бара жатқан сәті түсірілген видео тарады.