Алматыда жолақысы өсті: жаңа тариф қашан күшіне енетіні белгілі болды

Наурызбай ауданының тұрғындарымен кездесуінде әкім мен оның орынбасары Алматыда қоғамдық көлікте жүрудің жаңа тарифін енгізудің болжамды мерзімдерін айтты. Бұл туралы KAZ.NUR.KZ хабарлайды.

Алматы қаласы мәслихатының депутаттары өткен аптада қоғамдық көлікте жүрудің жаңа тарифін 120 теңге деп бекітті.

Осы орайда Алматы әкімі Ерболат Досаевқа жаңа тариф қашан күшіне енетіні туралы сұрақ қойылды.

"Мәслихаттан кейін шешім жарияланды. Мәслихат қабылдаған шешімдер мен тарифті енгізу мерзімі бекітілді", - деп мәлімдеді Досаев.

Оның орынбасары Сағындық Телібаев Алматыда 120 теңгелік тариф тамыз айының 3-5-і аралығында күшіне ене бастайтынын айтты.

Еске салсақ, Астанада 1 тамыздан бастап қоғамдық көлікте жол жүру ақысы 90 теңгеден 110 теңгеге өсетінін хабарлаған едік.

Айта кету керек, Астанада және қала маңында оқитын 18 жасқа дейінгі балалар үшін қоғамдық көлікте жол жүру 2020 жылғы наурыздан бастап тегін ұйымдастырылып келеді. Міндетті шарт – көлік картасының болуы және оны автобуста валидация өткізу.