Ақтауда кәсіпкерден бір млн теңге мен 6 көлік бопсалаған күдіктілер ұсталды

Маңғыстау облысының полицейлері прокуратурамен бірлесе, ЖШС басшылығынан ақша мен көлік бопсалады деген күдікпен бір топ адамды ұстады. Бұл туралы ведомство Instagram-дағы парақшасында хабарлады.

Күдіктілер кәсіподақ ұйымының жетекшілері бола тұра, белгілі бір ақпарат таратып, жұмыс процесін тоқтатамыз деп қорқытып, 5 миллион теңге және 6 "Тойота Хилюкс" автокөлігін талап еткен.

"Көрсетілген сома аударылғаннан кейін қоғамдық бірлестік төрағасы мен оның көмекшісі, сондай-ақ ақшаны алуға қатысы бар делдал ұсталды.

Бұл ретте делдалдың қалтасынан және көлігінен өсімдік тектес заты бар 12 қаптама тәркіленіп, сараптама тағайындалды", - делінген хабарда.

Қазір сотқа дейінгі тергеу амалдары жүргізілуде. Күдіктілер Ақтау қалалық ПБ уақытша ұстау изоляторына қамалды. Оқиғаға қатысы бар басқа адамдарды ұстау шаралары жүргізіліп жатыр.