Түркістан облысында Қызыл кітапқа енген құс фототұзаққа түсіп қалды

Түркістан облысында орналасқан "Сайрам-Өгем" ұлттық паркінің аумағында қара ләйлек фототұзаққа түсті. Бұл құс Қызыл кітапқа енген, деп хабарлайды KAZ.NUR.KZ Otyrar.kz-ке сілтеме жасап.

Маңызды тұстар

Бұл мәтін автоматты түрде ЖИ көмегімен жазылған және редактор тексермеген, сондықтан фактологиялық және грамматикалық қателер болуы мүмкін. Толығырақ жарияланымда.

• Түркістан облысындағы "Сайрам-Өгем" ұлттық паркінде Қызыл кітапқа енген қара ләйлек фототұзаққа түсті.
• Парк қызметкерлері фототұзаққа түскен басқа да жануарлардың, соның ішінде қонжықтар мен қабандардың бейнелерін жариялады.
• Айнұр Дилдабаева атап өткендей, ұлттық парк аумағында 28 қара ләйлек тіркелген, ал бұл түр Қазақстанның бірнеше қорғалатын аумақтарында кездеседі.

Телеарна хабарлағандай, "Сайрам-Өгем" ұлттық паркінің қызметкерлері қорықтағы фототұзаққа түскен кадрларды жариялады. Видеода ағашқа өрмелеп, өзара алысып ойнаған қонжықтар, азық іздеп, үйірімен жүрген қабандар көрінеді. Ең сүйінші жаңалық – фототұзақта Қызыл кітапқа енгізілген қара ләйлек кадрға ілініпті.

"Бұл кадрлар 2024 жылғы шілдеде түсірілген. Ұлттық парк аумағында санақ бойынша 28 қара ләйлек тіркелген", - деді "Сайрам-Өгем" МҰТП-нің Жануарлар дүниесінің өсімін молайту бөлімінің биологі Айнұр Дилдабаева.

"Қазақстанда қара ләйлек Баянауыл, Тарбағатай, Көлсай көлдері, Қарқаралы, Іле Алатауы, Катонқарағай, Жоңғар Алатауы, Шарын мемлекеттік ұлттық табиғи парктерінде және Батыс Алтай, Алматы, Марқакөл мемлекеттік ұлттық табиғи қорықтарында кездеседі. Бұл аумақтар осы сирек кездесетін түр үшін тұрақты орта құруда шешуші рөл атқарады", - делінген ҚР Орман шаруашылығы және жануарлар дүниесі комитетінің хабарламасында.

"Сайрам-Өгем" Түркістан облысында, Түркістан қаласынан 280 км, Шымкенттен 70 шақырым жерде орналасқан. Парк аумағына Түлкібас, Төлеби мен Қазығұрт аудандарының табиғаты әсем жерлері кіреді. Аумағы — 149 мың гектар. Құстардың 300-ге жуық, сүтқоректілердің 60-тан астам түрі мекендейді.