Ашуға булыққан FlyArystan жолаушылары Алматы әуежайында шу шығарды (видео)

Желіде FlyAryastan ұшағына кешігіп келген жолаушылар Алматы әуежайында шу шығарды деген ақпарат тарады. Әуе компаниясы осы жайтқа қатысты түсінік берді, деп хабарлайды KAZ.NUR.KZ.

Telegram-дағы Kris.p.media арнасында жарияланған видеода әуежайдағы жанжал бейнеленген. Кадрда ашуға булыққан жолаушылар әуе компаниясы қызметкерінің үстеліндегі заттарды лақтырып жатқанын көруге болады.

Жазбада SMS-хабарламадағы қателіктен жолаушылардың KC7053 рейсіне кешігіп, тәртіпсіздік жасап, әуежай мүлкін бұлдіріп, заттарды әуекомпания қызметкерлеріне қарай лақтырғаны айтылған.

"Әуе компаниясы өз қатесін мойындап, келтірілген шығынның орнын толтырды. Дегенмен бұл жайт осы рейспен ұшуға ерекше ниеттенген жолаушыларды тыныштандыра қоймаған. Мұндай жағдайларда өзара сыйластықты ұмытпаған жөн. Бұл жағдай мәселе тек қызметкерлерден емес, сонымен қатар жолаушылар тарабынан да туындайтынын көрсетті", - делінген жазбада.

KAZ.NUR.KZ тілшісі түсінік алу үшін FlyArystan әуе компаниясына хабарласты.

"2024 жылғы 19 тамызда Алматы – Астана бағытындағы KC7053 FlyArystan рейсінің ұшуы 09:05-тен 09:25-ке кешіктірілгенін хабарлаймыз. Жүйедегі қысқа мерзімді техникалық ақауға байланысты жолаушыларға рейс 09:25-тен 10:55-ке ауыстырылғаны туралы қате хабарлама жіберілген. FlyArystan келтірілген қолайсыздық үшін шын жүректен кешірім сұрайды", - деді әуекомпания өкілі.