Астанада құтқарушылар көпқабатты үйдегі араның ұясын алып тастады (видео)

Астанада құтқарушылар тұрғын үйден үлкен араның ұясын алып тастады. Бұл туралы Төтенше жағдайлар министрлігі Telegram-дағы арнасында хабарлады.

ТЖМ ақпаратынша, елордада Республика даңғылының тұрғындары құтқарушылардың көмегіне жүгінген. Олар көпқабатты тұрғын үйдің 8-9 қабаттары арасында ара ұя салғанын айтқан.

"ТЖМ жедел-құтқару жасағының қызметкерлері оқиға орнына келіп, қауіптен құтқарды. Төтенше жағдай туындаған жағдайда 112 нөміріне қоңырау шалыңыз!", - делінген хабарда.

Еске салсақ, бұған дейін Алматыда құтқарушылар шаршап қалған туристерді таудан түсірген.

ТЖМ мәліметінше, Бостандық ауданы Үлкен Алматы шатқалында 20-25 жас аралығындағы үш адамнан тұратын топ құтқарылды. "Советов" шыңынан түсу кезінде туристтер шаршап өздігінен түсе алмаған.

РЖҚЖ құтқарушылары туристерді таудан төменге түсіріп, ата-аналарына аман-есен тапсырды. Жастарға медициналық көмек қажет болмады.