"Командир оқ атты": Маңғыстауда мерзімді қызметтегі сарбаздың өлімінен кейін прокуратура іс қозғады

Бас әскери прокуратура Маңғыстау облысында мерзімді қызметтегі сарбаздың өліміне қатысты тергеуді бастағанын хабарлады. Бұл туралы қадағалау органына сілтеме жасаған KAZ.NUR.KZ хабарлайды.

2024 жылғы 7 қыркүйекте сағат 17:10 шамасында Ақтау қаласындағы ҚМ әскери бөлімдерінің бірінің взвод командирі "Оймаша" полигонының аумағында ПМ табельдік тапаншасынан қатардағы сарбазға оқ атқан. Салдарынан сарбаз қайтыс болды.

"Сол күні Батыс өңірлік әскери-тергеу басқармасы қасақана кісі өлтіру фактісі бойынша сотқа дейінгі тергеуді бастады (ҚК 99-бабының 1-бөлігі).

Тергеу органы күдіктіні ҚПК-нің 128-бабы тәртібімен ұстады және Ақтау қаласының уақытша ұстау изоляторына қамауға алды", - делінген хабарламада.

Қажетті кешенді тергеу амалдары жүргізілуде, қылмыстың себептері мен өзге де мән-жайлар анықталуда.

Іс бойынша процестік прокурор тағайындалды.

Тергеу барысы Бас әскери прокуратураның ерекше бақылауына алынды.

Қылмыстық процестік кодекстің 201-бабына сәйкес басқа мәлімет жарияланбайды.

Еске салсақ, 7 қыркүйек күні Маңғыстау облысында оқыс оқиға болды. Әкери полигонда мерзімді қызметтегі сарбаз ауыр жарақат алып, көз жұмғанын хабарлаған едік.

Кейіннен сарбаздың әкесі қорғаныс министріне жан-жақты тергеу жүргізуді талап еткен видеоүндеу жолдаған еді.

Қорғаныс министрлігі Маңғыстау облысындағы полигонда мерзімді қызметтегі сарбаздың қазасына қатысты пікір білдірген болатын.