Теміртау көшелерін ыстық су басты (видео)

Теміртауда жылу магистралінде құбыр жарылып, қала көшелерін ыстық су басты. Бұл туралы қала әкімдігіне сілтеме жасаған KAZ.NUR.KZ хабарлайды.

Instagram желісіндегі "V_krg" парақшасында оқиға орнынан видеолар жарияланды. Бейнежазбаларда қала көшелерін ыстық су басып жатқанын көруге болады. Видео авторының мәліметінше, бұл жағдай Теміртауда болған.

"Теміртауда құбыр жарылып, ыстық су басып жатыр. Балалар мен әйелдер күйіп жатыр", - деді автор.

Аталған жағдайға Теміртау әкімдігінің өкілдері пікір білдірді. Әкімліктің Instagram-дағы ресми парақшасында "Оқжетпес-Т" ЖШС қаланың жылу желілеріне температуралық сынақтар жүргізгені хабарланды. Мекеме тұтынушыларды алдын ала хабардар еткен.

"№1 ЖМ ескі учаскесінде (жөндеумен қамтылмаған) ауа компенсаторында, Ду 600 мм (Байсейітова/Құрылысшылар) апат орын алды. Қазіргі уақытта "Оқжетпес-Т" ЖШС күштерімен апатты жағдайды жою бойынша жұмыстар жүргізілуде. Осы оқиға барысында зардап шеккендер жоқ, жол учаскесі жабылды", - деп хабарлады әкімдік өкілдері.