"Жабайы құстар да бар": Түркістан облысында арыстан асыраған тұрғынның басы дауға қалды (видео)

Түркістан облысының тұрғыны өз үйінде жабайы құстарды мен арыстан асырап келген. Полиция қызметкерлері заңсыз әрекет жасау фактісін анықтап, жануарларды тәркіледі, деп хабарлайды KAZ.NUR.KZ.

Жедел-іздестіру іс-шараларының нәтижесінде Түркістан облысы полиция департаментінің ұйымдасқан қылмысқа қарсы күрес басқармасының қызметкерлері сирек кездесетін жануарлар мен құстарға қатысты заңсыз әрекет жасау фактісін анықтады.

"Жедел уәкілдер Сарыағаш ауданы тұрғындарының бірінің үйіне тексеру жүргізіп, ауласынан бір арыстан, екі бүркіт, сұңқар, екі үкі және екі кекілік құсын тәркіледі. Ер адам жабайы аңдарды өз қажеттілігі үшін асырағанын жеткізді", - делінген хабарламада.

Тәркіленген жануарлар Шымкент қаласындағы зообаққа орналастырылды.

Полицейлер бұл факт бойынша қылмыстық іс қозғалып, тергеу әрекеттері жүріп жатқанын мәлімдеді. Болған оқиғаның барлық мән-жайы анықталып жатыр.