"Бір адамға 10-нан артық қажет емес": цифрлық даму министрі Қазақстанда SIM-карта сатуды шектеу туралы айтты

Мәжіліс кулуарында цифрлық даму министрі Жаслан Мәдиев Қазақстанда бір адамға сатуға рұқсат етілетін SIM-карталардың санын шектеу туралы ұсыныс айтты. Бұл туралы KAZ.NUR.KZ хабарлайды.

"Ешқандай шешім әлі қабылданған жоқ. Сарапшы ретіндегі менің пікірім: әрқайсымызға 10 SIM-картадан артық қажет емес шығар.

Бұл бір адамға жеткілікті SIM-карталар саны деп ойлаймын Сараптамалық қоғамдастық және мемлекеттік орган өкілдерімен талқыланады, оның қорытындысы бойынша ұсыныс жасалады", - деді министр Жаслан Мәдиев.

Еске салайық, 16 қазанда мәжілістің отырысында Цифрлық даму вице-министрі бір адамға тиесілі SIM-карта санын шектеу керегін айтқан болатын.

Айта кетейік, былтыр қазан айында ІІМ бастығының орынбасары Игорь Лепеха Әкімшілік құқықбұзушылық туралы кодексіне SIM-карталарын басқа тұлғаларға беру бойынша өзгертулер енгізу қарастырылып жатқанын хабарлаған болатын. Бұл шара алаяқтармен күресуге бағытталған болатын.

Сондай-ақ жыл басында Қазақстанда виртуалды SIM картаны енгізу мүмкіндігі қарастырылып жатқаны хабарланған еді.