Түркістан облысында биыл сәбилерге қандай есімдер жиі қойылып жүр

Түркістан облысында биыл сәбилерге жиі қойылып жатқан есімдер белгілі болды. Бұл туралы KAZ.NUR.KZ хабарлайды.

"Азаматтарға арналған үкімет" мемлекеттік корпорациясы АҚ Түркістан облыстық филиалының мәліметіне сүйенсек, биыл 9 айда өңірде 40 835 сәби дүниеге келген. Ұл балаларға Нұрәли, Әлинұр, Әділет, ал қыздарға Айзере, Адина, Айлин, Әмина деген аттар жиі қойылған.

Еске салсақ, Түркістан облысы 6 қазан – референдум күні дүниеге келген сәби саны бойынша көш бастаған еді. Бұл күні өңірде 132 сәби дүние есігін ашты. Оның 62-сі қыз болса, 70-і – ұл.

Ұлттық статистика бюросы 2023 жылы балаларға көп қойылған есімдердің тізімін жариялаған болатын. Ұлдар арасындағы танымал есімдер Алихан, Омар, Амир, Алдияр, Айсұлтан, Алан, Али, Нұрислам, Мухаммад және Хамза. Ал қыз балаларға Медина, Айша, Айлин, Асылым, Сафия, Томирис, Раяна, Амина, Аяла, Айым деген аттар жиі қойылған.