Қостанай облысында жүз орындық жаңа балабақша ашылды

Республика күні қарсаңында Мичурин ауылында мемлекеттік тілде оқытатын "Еркетай" жекеменшік балабақшасының ашылуы өтті. Бұл туралы KAZ.NUR.KZ хабарлайды.

Қостанай облысы әкімінің орынбасары Ринат Мұхаметқалидың айтуынша, бұл маңызды оқиға мемлекеттің отбасы институтын қолдауға және халықтың өмір сүру сапасын арттыруға деген ұмтылысын көрсетеді.

Облыс әкімінің орынбасары Қостанай облысында ағымдағы жылы кәсіпкерлердің көмегімен екі балабақша ашылғанын атап өтті. Сондай-ақ ол осы бөбекжай балабақшасының негізін қалаушы, "Кең жер +" кәсіпкерлігінің басшысы Динара Ищановаға еліміздің болашағына салынған инвестиция үшін өз алғысын білдірді.

"Бүгінгі таңда Қостанай облысында 492 балабақша жұмыс істейді. Бұл балалардың 91 пайызын мектепке дейінгі біліммен қамтуға мүмкіндік берді. Қазақстан Республикасының күні қарсаңында 192 орынға арналған балабақша Рудный қаласында, ал 280 орындық балабақша Әулиекөл ауылында ашылған болатын. Қазір Рудный және Қостанай қалаларында мектепке дейінгі мекемелердің құрылысы жүргізілуде. Мұның барлығы балаларды мектепке дейінгі біліммен қамтамасыз етіп қана қоймай, жаңа жұмыс орындарын ашуға мүмкіндік береді", – деді шараның ашылуында Ринат Мұхаметқали.

"Еркетай" балабақшасы 1000 шаршы метрді құрайтын үш қабатты ғимаратта орналасқан. Балабақша 100 орынға арналған және балалардың үйлесімді дамуы үшін барлық қажетті жабдықтармен жабдықталған: кең ойын және жатын бөлмелері, музыка және спорт залдары, медициналық кабинет және қосымша сабақтарға арналған кабинеттер. Сонымен қатар ғимарат бейнебақылау жүйесімен, өрт дабылымен жабдықталған.

Мерекелік іс-шара барысында ауыл ақсақалдары Сапаржан ата мен Шамша апа қызыл лентаны салтанатты түрде қиды. Содан кейін ата-аналарға, ауыл тұрғындарына және іс-шара қонақтарына шағын экскурсия ұйымдастырылды.

Қостанай ауданының білім бөлімінің басшысы Турткараев Әлия Құсманқызының айтуынша, Мичурин атындағы орта мектеп жанындағы шағын орталыққа барып жүрген 50 бала "Еркетай" балабақшасына автоматты түрде ауыстырылады, ал қалған жартысы 28 қазаннан бастап INDIGO жүйесі арқылы кезекке тұруы керек. Балабақша мемлекеттік тапсырыс бойынша жұмыс істейді және әр балаға 50 мың теңгеден астам бюджет бөлінеді.

Айта кету керек, балабақшаға 1-2, 3-4, 4-5 жас аралығындағы балалар қабылданады.

"Біз болашақта "креативті бала күтуші" сияқты қосымша сыныптар, сонымен қатар модельдеу, сурет салу, шет тілдерін үйрену сияқты үйірмелер ашқымыз келеді. Ал тамақ дайындауда көкөністер мен жемістерді көбірек пайдалану арқылы балалардың дұрыс тамақтануын қадағалау жоспарда бар", - Қостанай ауданының білім бөлімінің басшысы Әлия Құсманқызы Тұрткараева айтты.

"Еркетай" бөбекжай балабақшасының ашылуы мектепке дейінгі мекемелердегі орын тапшылығы мәселесін шешіп қана қоймай, облыстың мектепке дейінгі білім беру жүйесін дамытудағы жаңа қадам болды.

Қостанай ауданына келсек, бүгінде облыста 2,5 мыңнан астам бала контингенті бар 10 арнайы ұйым жұмыс істейді. Соңғы үш жылда 1 жастан 3 жасқа дейінгі балаларды мектепке дейінгі тәрбиемен қамту 71 пайызға, 3 жастан 6 жасқа дейін 100 пайызға өсті.