Шарын шатқалында құны 1,5 млрд теңге болатын аспалы көпір салынады

2025 жылы Шарын шатқалында аспалы көпір құрылысы басталады. Бұл туралы Алматы облысы әкімдігінің баспасөз қызметіне сілтеме жасаған KAZ.NUR.KZ хабарлайды.

Әкімдік таратқан мәліметте жоба құны 1,5 млрд теңге екені көрсетілген. Ведомство өкілдерінің мәлімдеуінше, жобаны іске асыру барысында 50 жаңа жұмыс орны ашылады.

Аспалы көпір құрылысы 2025 жылы басталып, 2026 жылы аяқталады деп жоспарланған.

Бұған қоса, облыс әкімдігі өкілдері Шарын туристік аймағына электр желісін тартуға 87 млн теңге бөлінгенін жариялады.

Бұл шатқал – Шарын өзені бойымен 150 шақырымға созылып жатқан табиғи нысан. Туризм және спорт министрлігінің мәліметінше, биыл жарты жылда Алматы облысындағы туристік нысандарға, соның ішінде Шарын шатқалына 215 мыңнан аса турист барған.

Автор: Талғат Дүйсенбек

Мәтіннен қате тапсаңыз, бізге жазыңыз