Қазақстанның Киевтегі елшілігі Украинада жүрген азаматтарға елден кетуге кеңес берді

20 қарашада Қазақстанның Киевтегі елшілігі Украина аумағында жүрген қазақстандықтарға әуе шабуылдарының жиілегенін ескертіп, осы елден кетуге кеңес берді. Бұл туралы KAZ.NUR.KZ хабарлайды.

Мәлімет елшіліктің Telegram-арнасында жарияланды.

Елшілік барлық азаматты әуе шабуылы туралы ескертуге құлақ асып, дереу пана табуға, жеке басының қауіпсіздігін ойлауға және ресми органдардың ұсыныстарын орындауға шақырды.

Украинадан кеткісі келетін қазақстандықтар Польша немесе Молдоваға өтіп, әрі қарай коммерциялық әуе қатынасын пайдалана алады. Елшілік Молдоваға кіру үшін виза қажет еместігін, ал Польшаға Шенген визасымен ғана кіре алатынын ескертеді.

Украинада төтенше жағдайға тап болған қазақстандықтар елшіліктің консулдық бөліміне немесе сенім телефонына хабарласа алады: +38(044) 4831596, +38(044) 4891031, +380673470408.

Еске салсақ, сәрсенбіге қараған түні Ресей Украина аумағын 122 дронмен, С-300 және Х-59/69 зымырандарымен атқылады. Киев, Черкасск, Чернигов, Полтава, Кировоград, Житомир, Хмельницк, Сумы, Николаев, Херсон, Запорожье, Днепропетровск, Донецк және Харьков облыстарына соққы жасалды.

Мәтіннен қате тапсаңыз, бізге жазыңыз