Қазақстанның барлық өңірінде дабыл жүйесі іске қосылды

Бүгін, 21 қарашада Қазақстанның барлық аймақтарында сағат 11:00-де дабыл қағылды. Төтенше жағдайлар министрлігі бұл шараның оқу-жаттығу аясында өтетінін хабарлады. Бұл туралы KAZ.NUR.KZ ведомствоның сайтына сілтеме жасап хабарлайды.

2024 жылдың 21-22 қарашасында елімізде "Қыс-2024" республикалық командалық-штабтық оқу-жаттығуы өтеді.

Республикалық штаб Көкшетау қаласында орналасқан.

"Оқу-жаттығуға жергілікті атқарушы органдар, орталық мемлекеттік органдар, республикалық және облыстық қызметтер мен азаматтық қорғау құралымдары, ҚР ТЖМ аумақтық бөлімшелері қатысады.

Оқу-жаттығу нәтижелері бойынша облыстық азаматтық қорғау жүйелерінің қыс мезгілінде болуы мүмкін төтенше жағдайларға дайындығы бағаланатын болады", - делінген хабарламада.

Аталмыш шара аясында бүгін сағат 11:00-де электрдабылдар мен дабылды-сөйлеу құрылғылары іске қосылды, сондай ақ теледидар және радиоарналардың эфирі уақытша үзілді. Дабыл халықтың "Баршаның назарына!" бірыңғай құлақтандыру сигналына ден қою тәртібін пысықтауға бағытталған.

Мәтіннен қате тапсаңыз, бізге жазыңыз