Шымкенттегі алқа мәжілісінде білім беру саласындағы өзекті мәселелер талқыланды

Шымкенттегі "Түркістан" сарайында білім басқармасының ұйымдастыруымен алқа мәжілісі өтті. Жиынға білім беру мекемелері мен балабақша, колледж басшылары, құқыққорғау органдарының өкілдері және қала әкімінің орынбасары Сәрсен Құранбек қатысты. Бұл туралы қалалық ӨКҚ Instagram-дағы парақшасында хабарлады.

Мәжіліс барысында білім басқармасы басшысының уақытша міндетін атқарушы Гүлнар Дәрібаева баяндама жасап, білім беру ұйымдарындағы оқушылар мен студенттердің денсаулығы, сапалы білім алуы және қауіпсіздігі мәселелеріне тоқталды.

Қала әкімінің орынбасары Сәрсен Құранбек өз сөзінде білім саласындағы кейбір олқылықтарды атап өтті. Сондай-ақ кәмелетке толмағандар арасындағы құқықбұзушылық, суицид және зорлық-зомбылықтың алдын алу бағытындағы шараларды күшейту қажеттігін баса айтты.

Жиын қорытындысы бойынша, білім басқармасына бірқатар нақты тапсырмалар жүктелді.