Шымкентте бірқатар балалар киімі мен ойыншығы талапқа сай емес болып шықты

Шымкентте ссанитар дәрігерлер бүлдіршіндер мен жасөспірімдерге арналған тауарлардан кемшіліктер анықтаған. Мәселен, шымкенттік сала мамандары тексерілген 9 ойыншықтың жартысынан көбіне талапқа сай емес деген анықтама берді. Бұл туралы Otyrar.kz хабарлайды.

Басылым мәліметінше, СЭҚ мамандары бүлдіршіндер мен жасөспірімдерге арналған киім мен аяқ киімнің 485 үлгісіне сынама жүргізіп, 358-інен кемшіліктерді анықтаған. Тексерілген нұсқалардың 7 пайыздан астамы физикалық-гигиеналық талаптарға сай келмеген.

"Кеден одағының "Балалар мен жасөспірімдерге арналған өнімнің қауіпсіздігі туралы" техникалық регламентінің талаптарына сәйкес келмейтін 358 үлгі анықталды. Оның ішінде ЕАЭО-ға мүше мемлекеттердің өнімі 65, басқа елдердің өнімі 293. Бұзушылықтардың 92,7 пайызы таңбалау ережелерін сақтамау болса, 7,3 пайызы физикалық-гигиеналық көрсеткіштер бойынша талаптарға сәйкес келмеу", - деді ДСМ Санитариялық-эпидемиологиялық бақылау комитетінің баспасөз қызметі.

Ал Шымкент қалалық санитариялық-эпидемиологиялық бақылау департаментінің мамандары жыл басынан бері тоғыз балалар ойыншығына сынама жүргізген. Оның алтауы талапқа сай болмай шыққан.

"Балалар киімінен 7 үлгі зерттелді. Оның екеуі таңбалау көрсеткіші бойынша талапқа сай келмеген, таңбасы мемлекеттік тілде болмаған. Одан бөлек 9 ойыншық зерттелді. Оның алтауынан таңбалануы бойынша сәйкессіздік анықталды", - деді Шымкент қаласы санитариялық-эпидемиологиялық бақылау департаменті басшысының орынбасары Алдарқұл Ахметов.

Мәтіннен қате тапсаңыз, бізге жазыңыз