"Мерзімі өтіп кеткен": желіде әкімдіктердің балаларға берген жаңажылдық сыйлықтарына қатысты шу шықты

Желіде Жаңа жыл қарсаңында балаларға таратылған сыйлықтарға қатысты дау шығып жатыр. Бірінде тәттілердің мерзімі өтіп кетсе, енді бірінде ата-аналар сыйлыққа бөлінген бюджет қаражатының мақсатты жұмсалғанына күмән келтірген. Мән-жайды KAZ.NUR.KZ материалынан оқыңыз.

26 желтоқсанда Шымкенттің Оқушылар сарайында 180 жартылай және тұл жетім балаларға арналған жаңажылдық қайырымдылық іс-шарасы ұйымдастырылған. Артынша желіде шарада таратылған тәттілердің мерзімі өтіп кеткені туралы ақпарат тарады. Аталған мәселеге Шымкент қаласы әкімдігі пікір білдіріп, желіде тараған ақпараттар бойынша тексерістер жүргізілгенін мәлім етті.

"Әлеуметтік желіде сол сыйлықтардың ішіндегі тәттілердің мерзімі өткендігі туралы видеолар тарады. Осыған байланысты таратылған жаңажылдық іс шараға келе алмаған 12 баланың сыйлығындағы тәттілердің мерзімі тексерілді.

Нәтижесінде жаңажылдық сыйлықтардың ішінде екі-үш тәттінің мерзімі өткендігі анықталған", - делінген әкімдіктің жауабында.

Жетісу облысында да әкімдіктің жағдайы жоқ және көпбалалы отбасынан шыққан балаларға берген жаңажылдық сыйлықтарына қатысты сұрақтар туындаған. Әлеуметтік желіде жарияланған видеода әйел балаларға таратылған сыйлықтар бағасына сай еместігін айтып, ренішін білдірді. Видеоны Telegram-дағы HALYQSTAN арнасы таратқан. Бұл мәселе бойынша Жетісу облысының білім басқармасы ата-аналар шағымынан кейін жағдайды тексеру үшін жұмыс тобы құрылғанын мәлім етті. Тексеру нәтижесінде бір адам жұмыстан босатылған. Ведомство мәліметінше, сыйлықтарды Сарқан аудандық білім бөлімі сатып алған.

"Мемлекеттік сатып алу ережелерін бұзғаны үшін бөлімнің бухгалтері қызметінен босатылды. Сарқан аудандық білім бөлімінің басшысына қатаң сөгіс жарияланды.

Сонымен қатар сыйлықтарды дайындаған қызмет көрсетушіге 27 желтоқсанға дейін барлық бұзушылықты жою, балаларға жаңажылдық сыйлықтарды қайта қарастырып, белгіленген стандарттарға сәйкестендіру тапсырылды", - делінген басқарманың видеоға қатысты берген түсініктемесінде.

Мәтіннен қате тапсаңыз, бізге жазыңыз