Шымкентте бір мектепте 13 жұп егіз оқиды (видео)

Шымкентте бір мектепте 13 жұп егіз оқиды. Олар мегаполистің демографиялық өсімінің айқын көрінісі іcпеттес. №138 жалпы орта білім беру ошағында тәлім алатын оқушылар әртүрлі сыныпта білім алып жүр. Мектеп ұжымы жаңа жыл кешінде егіздерге ерекше құрмет көрсетіп, мерекелік тарту жасады, деп хабарлайды Ontustiktv.kz.

Телеарна мәліметіне сүйенсек, №138 мектеп Асар-2 мөлтекауданында орналасқан. Елдімекенде көпбалалы отбасылар көп. Мектеп директорының арнайы сыйлығын алған балалар да сол әлеуметтік отбасылардың мүшесі. Жаңа жыл кешін ерекше қарсы алған балғындардың қуанышы ерекше.

Білім ошағында 2000-дай бала сапалы біліммен қамтылып отыр. Үш жыл бұрын 600-ге жетер-жетпес оқушымен басталған жұмыс бүгін нәтижесіз емес. Өткен оқу жылында 180 бала мектеп табалдырығын аттаған болса, биыл 200-ден аса балғын бірінші сыныпқа қабылданған.

Жаймашуақ күнімен, меймандос халқымен ерекешеленген Шымкент қашанда оқ бойы озық қалалардың қатарында. Миллионды шаһарда жыл басынан бері 26574 сәби дүниеге келген. Оның 12950-і қыз. 13624-і ұл балалар. Сондай-ақ 293 егіз, 6 үшем дүние есігін ашқан.