Алматы метросында қайғылы оқиғадан кейін қоршаулар қойыла бастады (видео)

Алматы метро станцияларында жолаушылардың қауіпсіздігін қамтамасыз ету мақсатында қоршаулар қою жұмыстары басталды. Бұл туралы KAZ.NUR.KZ метрополитеннің баспасөз қызметіне сілтеме жасап хабарлайды.

"Метро станцияларында жолаушылардың қауіпсіздігін қамтамасыз ету мақсатында қоршаулар орнату жұмыстары басталды.

Жұмыс регламентіне сәйкес, алдымен берік металдан жасалған тіректер орнатылады, кейіннен оларға мықты шыныдан жасалған бөлгіштер бекітіледі.

Жұмыстарды толық аяқтау алдағы апта ішінде жоспарланып отыр", - делінген хабарламада.

Естеріңізге сала кетсек, былтыр желтоқсан айында Алматыда метро станцияларының бірінде жолаушы рельске құлап кетіп қаза тапқан еді.

Кейін "Қазақ зағиптар қоғамының" өкілі марқұм туралы айтып, метро зағип жандар үшін өте ыңғайсыз көлік түрі екенін жеткізді.