"Оларға қамқорлық жасау - менің міндетім": ақтөбелік кәсіпкер қызметкерлеріне үй салып берді (фото)

Хромтау ауданында ауыл шаруашылығымен айналысатын кәсіпкер қоластындағы қызметкерлерге үй салып берді. Шаруа қожалығы ауыл шаруашылығын дамытумен ғана емес, жергілікті тұрғындардың өмір сүру жағдайын жақсартуға қолғабыс етіп келеді, деп хабарлайды KAZ.NUR.KZ облыс әкімдігінің ресми сайтына сілтеме жасап.

Облыс әкімдігінің баспасөз қызметінің хабарлауынша, "Данияр" шаруа қожалығы аудан өміріне белсенді араласады және қарияларға, көпбалалы отбасыларға және жастарға көмек көрсете отырып, қайырымдылық жасайды.

Шаруа қожалығының басшысы өз бастамасымен былтыр мамыр айында қызметкерлеріне 10 үй салуды бастаған. 2025 жылдың қаңтарында алғашқы үйлер қоныстануға беріле бастады.

"Әрқашан кез келген істің сәтті шығуы жаныңда жұмыс істейтін адамдарға байланысты деп ойлаймын. Менің жұмысшыларым - менің нағыз серіктестерім және отбасым. Оларға қамқорлық жасау – менің міндетім. Үй салу – бұл үлкен бизнестегі шағын қадам, бірақ бұл олардың өмірін жақсартуға көмектеседі және біздің ұжымда одан да күшті қарым-қатынас орнатады деп сенемін. Біз әрқашан ұжымның әр мүшесінің өздерін үйіндегідей сезінгенін қалаймыз және оларды қолдаймыз", - дейді "Данияр" шаруа қожалығының басшысы Серік Оразымбетов.

Жаңа үйге алғашқылардың бірі болып көпбалалы Төлемісовтердің отбасы көшті. Үйлі болған Бағдат Төлемісов шаруа қожалығында жұмыс істейді, ол егін жинайтын комбайнды жүргізеді. Өз қызметкерінің еңбекқорлығы мен жауапкершілігін көрген Серік Оразымбетов оған жаңа үйдің кілтін табыстады.

"Баспана – бұл жайлылық қана емес, болашаққа деген сенімділік. Біз бұл күнді ұзақ күттік, енді бізде бүкіл отбасымыз бақытты өмір сүретін жайлы орын бар. Басшымыз Серік Оразымбетовке бізді жұмыспен қамтамасыз етіп қана қоймай, жақсы өмір сүруге жағдай жасағаны үшін көп рахмет. Бұл  отбасымызға маңызды көмек және өте жоғары бағалаймыз", - деген Бағдат Төлемісов кәсіпкерге алғысын білдірді.

Облыс әкімі Асхат Шахаров Хромтау ауданына жұмыс сапары барысында Серік Оразымбетовпен кездесіп, жаңа қоныс иелерін өміріндегі маңызды оқиғамен құттықтады.

"Сіз – адамдарға қамқорлық пен ауыл тұрғындарын қолдаудың нағыз үлгісі болып отырсыз. Жұмысшыларға арналған тұрғын үй салу бастамаңыз, көпбалалы отбасыларға көмектесу және қайырымдылық – бұл басқа кәсіпкерлерге күш беретіндей әлеуметтік жауапкершіліктің жарқын көрінісі. Сіздің іс-әрекетіңіз аудандағы өмірді жақсартуға айтарлықтай әсер етеді және ең жоғары құрметке лайық", - деді әкім шаруа қожалығының басшысына.

Жаңа қоныс иелерімен кездесу соңында Асхат Шахаров оларға денсаулық және бақ-береке тілеп, ұжымға қолдау мен көңіл бөлу кез келген бизнестің маңызды құрамдас бөлігі болуы тиіс екенін айтқан.