БАҚ: Анталия - Астана бағытындағы ұшақ екі қазақстандықтың қатысы бар жанжалға бола шұғыл қонды

Анталиядан Астанаға бағыт алған Pegasus Airlines компаниясының ұшағы жолаушылар арасындағы төбелеске байланысты шұғыл қонды. Төбелеске қатысушылардың арасында қазақстандық әйелдер де бар, деп жазады KAZ.NUR.KZ TRT Haber басылымына сілтеме жасап.

Басылымның мәліметіне сүйенсек, ұшақ бортында украиндық ерлі-зайыпты мен қазақстандық екі әйелдің арасында жанжал басталып, көп ұзамай ол төбелеске ұласқан.

Экипаж командирі қонуға шешім қабылдаған. Ұшақ Эрзурум қаласының әуежайына қонды.

Түркиялық басылымның хабарлауынша, төбелеске қатысы бар барлық жолаушы ұшақтан шығарылды - тараптар бір-бірінің үстінен шағым түсірген. Сондай-ақ басылым төбелеске қатысушылар алдымен ауруханаға денсаулық жағдайын тексеру үшін жеткізілгенін, кейін полиция бөлімшесіне жеткізілгенін жазады.

Ұшақ діттеген бағытына қайта ұшты.