Шымкенттен Қытайдың Сиань қаласына тікелей рейс ашылмақ

"SCAT" әуе компаниясы Шымкент қаласынан Сиань қаласына тікелей рейстерді іске қосуды жоспарлап отыр. Бұл туралы Көлік министрлігінің баспасөз қызметі Telegram-дағы арнасында хабарлады.

Көлік министрлігінің баспасөз қызметінің хабарлауынша, жаңа халықаралық рейстерді ашу бойынша жүргізіп жатқан жұмыс шеңберінде қазақстандық әуекомпаниялар Грузия мен Қытай бағыттары бойынша жаңа рейстерді іске қосады.

"Биыл 28 мамырдан бастап "SCAT" әуекомпаниясы Шымкент қаласынан Сиань қаласына тікелей рейстерді іске қосуды жоспарлап отыр. Рейстер сәрсенбі және сенбі күндері орындалады. Қазіргі уақытта Сиань қаласына тікелей рейстерді Қытай әуекомпаниялары Алматы мен Астанадан орындайды", - делінген хабарламада.

Жаңа бағыттардың ашылуы елдер арасындағы сауда-экономикалық, инвестициялық, туристік және мәдени ынтымақтастықты одан әрі дамытуға ықпал ететінін айтылады.

Еске сала кетейік, бұған дейін "Air Astana" әуекомпаниясы Атыраудан Тбилисиге тікелей рейстерді іске қосуды жоспарлап отырғанын хабарлағанбыз. Рейстер аптасына үш рет сейсенбі, жұма және жексенбі күндері Airbus типті әуе кемелерімен орындалады. Бүгінгі таңда Тбилисиге Алматы және Ақтау қалаларынан рейстер бар.

Мәтіннен қате тапсаңыз, бізге жазыңыз